في ناس أنت ما عملتلهم إشي، بس بكرهوك هيك بدون سبب، مش لأنك غلطت بحقهم، بس لأنك ذكّرتهم بنقص عندهم، أو بوجع ما قدروا يواجهوه.. ممكن تميّزك، حضورك، أو حتى بساطتك..

بتصحّي جواتهم صراعات همه مش قادرين يواجهوها، فَـ بتحوّل إعجابهم الصامت، لكُره بدون سبب.

عشان هيك، كل ما حسّيت برفض غريب أو عِداء مفاجئ من الناس.. لا تراجع حالك.. راجع استقامتك.. وطوّل بالك، وكمّل بطريقك بثبات.. صدقني أنت صح.. متفقين ؟؟

صدقني كل ما بتتأخر في انك تحسم أمر متعلق بحياتك في التوقيت المناسب؛ كل ما فاتورة القرار رح تكون أغلى..

خليك صاحي.. لأنه العمر قصير.. واليوم أحسن من بكره، وبكره أحسن من اللي بعده.. فيه اقتباس بحكي: (عندما تركب القطار الخطأ حاول أن تهبط في أول محطة لأنه كلما زادت المسافة زادت تكلفة العودة).

العلاقة الخطأ، ابترها ما تعالجها نصيحة.

خلي عندك يَقين إنه لساته فيه خير بستناك، وفي لحظات حلوة راح تعيشها، وأيام راح تبكي فيها من كرم ربنا ومن شدة الفرح،

حتى لو إنتَ حاليًا بتعيش أيام صعبة فَمُستحيل حياتك تضل هيك، سيدنا علي بن أبي طالب حكالنا : "الدهر يومان، فيوم لك ويوم عليك، فإذا كان لك فلا تبطر، وإذا كان عليك فاصبر".

وإنتَ فعلاً ما في قُدامك حاليًا غير الصبر، اصبر وصدقني ربنا راح يُجبر بخاطرك ويراضيك.. اصبر واترك الأمر لله فهذا شأنه.

أكتر شغلة ندمان عليها بحياتي إنّي كُنت بعدّي، مواقف وأشياء كتير زعلتني وكان المفروض أوقف عندها وأحاسب اللي قُدامي وأزعل وأعمل اللي يعجبني لأني صاحب حق، لكن أنا كُنت بقول معلش وبمشّي اليوم، مع إنه نفس الناس هي لو غلطت في حقهم غلطة صغيّرة لا تُذكر.. كان نصبولي محكمة وبيحاسبوني بمُنتهى الوقاحة!

حقيقي أنا أسف لنفسي عشان كُنت بتهاون في حقوقي لإنه هاي الناس لازم تاخُد حقك من بين عيونها.

أعلى درجات الأمان إنّك تلاقي شخص ما تهون عليه مهما صار، وما يهون عليه يزعلك أو يتركك لحالك أو حتى يجرحك بكلمة.

‏الأمان مش بس حدا يحميك من الناس والمُجتمع، الأمان يعني شخص يحميك حتى من نفسك، يقويك في لحظات ضعفك، شخص يحببك في نفسك لما تبلش تكرهها.

‏الأمان إنّك تطمئن وترتاح، ولو حسيت بالأمان في علاقتك مع اي شخص بالدنيا راح يكون عندك استعداد تتحمل أي اشي.. وقتها كلشي راح يعدّي ويهون طالما إنتَ متطمئن.